ᐃᒃᐱᐊᕐᔪᖕᒥ ᐅᓂᒃᑳᓕᐊᖑᓯᒪᔪᑦ

ᐃᒃᐱᐊᕐᔪᒃ ᕿᑭᖅᑖᓘᑉ ᑐᓄᓂᕈᓯᖓᓃᑦᑐᖅ, 600 ᑭᓛᒥᑕᓪᓗᐊᓂ ᐅᖓᓯᖕᓂᓕᖕᓂᒃ ᐅᑭᐅᖅᑕᖅᑑᑉ ᑭᒡᓕᓕᐅᖅᑕᐅᓯᒪᓂᖓᑕ ᖁᓛᓃᑦᑐᖅ. ᖃᓪᓗᓈᑎᑐᑦ ᐃᒃᐱᐊᕐᔫᑉ ᐊᑎᖓ ᐃᓕᓴᕆᔭᐅᓯᒪᔪᖅ ᐋᑎᒡᕙᐃᖑᓂᖓᓂᒃ. ᖃᖅᑲᓄᑦ ᐊᕙᓗᔭᐅᓯᒪᓂᖓᓄᑦ ᓄᓇᓕᒃ “ᐃᒃᐱᐊᕐᔫᖅᑰᔨᓪᓗᓂ” ᐊᑦᑎᖅᑕᐅᓯᒪᔾᔪᑎᒋᔭᖓ ᐃᒃᐱᐊᕐᔪᖕᒥᒃ. 750ᓪᓗᐊᓂᒃ ᐃᓄᒋᐊᖕᓂᓕᒃ, 95% ᐃᓅᓪᓗᑎᒃ ᐅᖃᐅᓯᖃᖅᑎᐅᓪᓗᑎᒡᓗ ᐃᓄᒃᑎᑐᑦ ᓄᓇᓕᖕᓂ. 1936ᒥ, ᓂᐅᕕᖅᑎᒃᑯᑦ ᐊᕐᕌᒍᓂᑦ ᖁᓕᓄᑦ ᒪᑐᓯᒪᓚᐅᖅᖢᑎᒃ ᒪᑐᐃᒃᑲᓐᓂᕐᒪᑕ ᐃᓐᓄᒃᐸᓪᓕᐊᓕᓚᐅᖅᑐᖅ. ᐊᒪᕈᐊᓕᒃᑯᑦ ᐃᓚᒌᑦ ᓂᐅᕕᖅᑎᒃᑯᓐᓄ ᐱᓕᕆᔨᑖᖑᑎᓪᓗᒋᑦ ᑖᒃᑯᐊᑐᐊᖑᕙᓚᐅᕋᓗᐊᖅᖢᑎᒃ ᐊᕐᕌᒍᒐᓴᖕᓄᑦ. ᐃᒃᐱᐊᕐᔪᒃ. ᐃᓕᓐᓂᐊᕐᕕᒃᑕᖃᓕᖅᑎᓪᓗᒍ 1962ᒥ ᓄᓇᓕᙳᖅᐸᓪᓕᐊᓕᕐᓂᑯ. ᐊᓯᖏᓐᓂᒃ ᕿᑭᖅᑖᓗᖕᒦᑦᑐᑎᑐᑦ ᒐᕙᒪᑐᖃᒃᑯᑦ ᐃᒡᓗᓕᐅᖅᐸᓪᓕᐊᓕᖅᑎᓪᓗᒋᑦ ᐃᓄᐃᑦ ᓄᓇᓕᖕᓄᑦ ᓅᑉᐸᓪᓕᐊᓕᓚᐅᖅᑐᖅ ᐃᒃᐱᐊᕐᔪᖕᒧᑦ ᓄᓇᓕᕋᓛᓂᙶᖅᖢᑎᒃ 1960 ᐱᒋᐊᕐᓂᖓᓂ. ᐃᒃᐱᐊᕐᔫᑉ ᓄᓇᖓ ᓄᓇᖓᑕᓗ ᖃᓂᒋᔮ ᐊᕐᕌᒍᓄᑦ 4000ᓄᑦ ᐊᖑᓇᓱᒡᕕᐅᖏᓐᓇᐅᔭᖅᑐᖅ ᐃᖃᓪᓕᐊᕐᕕᐅᖏᓐᓇᖅᐸᒃᖢᓂᓗ ᐃᓄᖕᓄᑦ ᓯᕗᓕᖏᓐᓄᓪᓗ.
ᐊᕐᕌᒍᑲᓪᓚᐅᓕᖅᑐᓄᑦ ᐃᒃᐱᐊᕐᔪᖕᒥᐅᑦ ᐃᓄᐃᑦ ᖃᐅᔨᒪᔭᑐᖃᖏᑦ ᑲᑎᒪᔨᕋᓛᖃᓕᖅᑐᑦ ᐃᓚᐅᑎᑦᑎᓯᒪᓕᖅᖢᑎᒡᓗ ᐅᓂᒃᑳᖅᑎᐅᔪᓂᒃ, ᖃᐅᔨᒪᔭᖏᓐᓂᒃ, ᐃᓅᓯᕆᓚᐅᖅᓯᒪᔭᖏᓐᓂᒃ ᐊᕙᑎᖏᓐᓂᒡᓗ, ᐅᓂᒃᑳᖅᑕᐅᔪᑦ ᑐᓵᔭᐅᔪᓐᓇᖅᑐᑦ ᓂᐱᓕᐅᖅᓯᒪᔪᑦ ᐅᑯᐊ:

- ᐃᓄᐃᑦ ᐸᖅᑭᑦᑎᐊᖅᓯᓇᓱᒍᑎᖏᑦ ᐊᕙᑎᖏᓐᓂᒃ
- ᐊᓐᓂᕆᔭᐅᔪᑦ ᐱᖅᑯᓯᖃᕐᕖᓪᓗ ᓯᕐᒥᓕᒃ ᑲᓇᑕᐅᑉ ᒥᕐᖑᐃᖅᓯᕕᖓᓂ
- ᖃᐅᔨᒪᓂᖅᐳᑦ ᑐᓴᖅᑕᐅᑎᖁᓪᓗᒋᑦ ᓯᕗᓂᒃᓴᖃᑦᑎᐊᖁᓪᓗᑕ
 

ᐱᔭᒃᓴᕆᒐᑦᑎᒍ ᓄᓇᖁᑎᑦᑎᓐᓂ ᐸᖅᑭᑦᑎᐊᕆᐊᖃᕐᓂᑦᑎᓐᓂ

ᒪᐃ 2008ᒥ, ᓯᑭᑑᒃᑰᖅᖢᑕ ᐊᐅᓪᓛᖅᓯᒪᓚᐅᕋᑦᑕ ᐃᒃᐱᐊᕐᔫᑉ ᓄᓇᖓᑕ ᖃᓂᒋᔮᓂ ᓴᓐᓂᕈᒑᓗᐃᑦ ᐊᖅᑯᑎᖓᓂ, ᓯᓈᓯᐅᕐᕕᖕᒥ, ᐅᒥᐊᕐᔪᐊᖑᐊᕐᒥ ᑕᖕᒫᕐᕕᖃᖅᖢᑕ,


ᖄᐱᐅᑉ ᒪᒃᑖᓪᓗ ᓄᓇᒋᓯᒪᓂᑯᖓᑕ ᖃᓂᒋᔮᓂ.ᖄᐱᒃ 1920ᒥ ᐃᓅᓂᑯ ᐅᒃᑯᓯᒃᓴᓕᖕᒥ, ᓇᐅᔮᑦ ᖃᓂᒋᔮᓂ. ᑕᐃᔅᓱᒪᓂ ᐃᓄᐃᑦ ᓇᕈᓇᒃᑎᓪᓗᒋᑦ ᓄᓇᓕᒫᒥ ᓂᕐᔪᑎᓂᒃ ᒪᓕᒃᖢᑎᒃ ᐊᓐᓇᐅᒪᔾᔪᑎᒋᓂᐊᖅᑕᖏᓐᓂᒃ, ᐅᑭᐅᒥ ᖃᕐᒪᖃᖅᐸᒃᖢᑎᒃ, ᐃᒡᓗᕕᒃᑲᒥᐅᑕᐅᕙᒃᖢᒡᓗ, ᐅᐱᕐᖓᒃᓵᒥ ᑐᐱᖏᓐᓃᓕᖅᐸᒃᖢᑎᒃ.ᖄᐱᒃ ᐃᓚᖏᓪᓗ ᓄᓇᖃᓚᐅᖅᑐᑦ ᐃᒃᐱᐊᕐᔫᑉ ᓯᓚᑖᓂ ᐊᕐᕚᖅᑐᒥ ᓇᓂᓯᕕᐅᓪᓗ ᓯᒡᔭᖓᓂ 1970 ᐊᕐᕌᒍᖏᓐᓂ ᐃᒃᐱᐊᕐᔪᖕᒧᑦ ᓅᓕᓚᐅᖅᓯᒪᔪᑦ ᐃᒡᓗᖃᐅᖃᑦᑕᓕᖅᑎᓪᓗᒍ ᓄᓇᓕᖕᓂ.ᐊᐃᖓ ᐃᓅᔪᓐᓃᓚᐅᖅᑎᓪᓗᒍ 1984ᒥ, ᐃᒡᓗᕋᓛᓕᐅᖅᑕᐅᓚᐅᖅᑐᖅ ᐃᓂᒋᓪᓗᓂᐅᒡᓗ ᐊᕐᕌᒍᓕᒫᑉ ᐃᓗᐊᓂ, ᖁᓪᓕᕐᒧᑦ ᐅᖅᑰᔾᔪᑎᖃᖅᖢᓂ, ᐅᖄᓚᐅᑎᖃᑦᑎᐊᖅᖢᓂᓗ, ᐃᓚᒥᓄᑦ ᐅᖄᓚᕝᕕᐅᔪᓐᓇᑦᑎᐊᖅᑐᒥᒃ.ᖄᐱᒃ ᐸᓂᖓᓗ ᑭᒍᑎᒃᑳᕐᔪᖅ ᐃᕐᓂᓱᒃᔩᔪᓕᕆᓂᕐᒧᑦ, ᖃᓄᐃᖏᑦᑎᐊᖁᔨᖏᓐᓂᕐᒧᓪᓗ ᐱᓕᕆᔨᒻᒪᕆᐅᖃᑦᑕᖅᑑᒃ ᓄᓇᓕᖕᓂ ᐃᓛᓐᓂᒃᑯᓪᓗ ᖃᓪᓗᓈᑦ ᓄᓇᖓᓄᑦ ᐅᖃᓪᓚᕆᐊᖅᑑᑎᒋᕙᒃᖢᓂᐅᒃ.


ᒪᒃᑖᖅ ᐊᓯᐊᕐᒥ ᖃᒪᓂᑦᑐᐊᑉ ᖃᓂᒋᔮᓂ 1932ᒥ ᐃᓅᓂᑯ. ᒫᒃᑖᖅ ᖃᑕᕐᖑᑎᖏᓪᓗ ᐊᕐᕚᖅᑑᒧᒃ ᓅᓚᐅᖅᓯᒪᔪᒃ 1947, ᐊᑖᑕᒥᓂᒃ ᐅᖃᖅᑭᔭᖅᑐᖅᓯᒪᓪᓗᑎᒃ ᕼᐋᒪᓪᑕᓐᒧᑦ ᐋᓐᓂᐊᕕᓕᐊᖅᑎᑕᐅᓯᒪᑎᓪᓗᒍ. ᑭᓯᐊᓂ ᐊᑖᑕᖓ ᐅᑎᖐᓐᓇᓚᐅᖅᓯᒪᔪᖅ, ᒪᒃᑖᖅ ᖃᑕᕐᖑᑎᖏᓪᓗ ᐊᕐᕌᖅᑑᕐᒦᖏᓐᓇᓕᕐᓂᑯᐃᑉ ᐅᑭᐅᒃᑯᑦ ᖃᕐᒪᕐᒥᐅᑕᐅᕙᒃᖢᑎᒃ ᐅᐱᕐᖓᒃᓵᖑᕌᖓᑦ ᑐᐱᕐᒦᓕᖅᐸᒃᖢᑎᒃ ᐊᕐᕌᒍᓄᑦ 25ᓄᑦ ᐊᕐᕚᖅᑑᕐᒥᐅᑕᐅᓚᐅᖅᑐᑦ. ᒫᒃᑖᖅ ᐊᑯᒪᓕᒃ ᓄᓇᒋᔭᑦᑎᓐᓂ ᐸᖅᑭᑦᑎᐊᕆᐊᖃᕐᓂᑦᑎᓐᓂ ᓯᓚᐅᓪᓗ ᐊᓯᔾᔨᖅᐸᓪᓕᐊᓂᖓᓄᑦ ᑭᒡᒐᖅᑐᐃᔨᐅᖏᓐᓇᖅᐸᒃᑐᖅ.  ᓯᕐᒥᓕᒃ ᑲᓇᑕᐅᑉ ᒥᕐᖑᐃᖅᓯᕕᖓ ᐱᒋᐊᖅᑕᐅᓕᖅᑎᓪᓗᒍ ᑲᑎᒪᔨᐅᓂᑯ ᒥᕐᖑᐃᖅᓯᕕᙳᖅᑎᑕᐅᓯᒪᓕᖅᑎᓪᓗᒍᓗ, ᐃᓚᒋᔭᐅᓚᐅᖅᓯᒪᓪᓗᓂᓗ ᒥᕐᖑᐃᖅᓯᕕᓕᕆᔨᒃᑯᑦ ᑲᑎᒪᔨᖏᓐᓄᑦ.

ᖄᐱᐅᑉ ᒪᒃᑖᓪᓗ ᐃᓚᖏᑕᓗ ᓄᓇᓂᖑᖏᑦ ᑕᑯᔭᖅᑐᖅᓯᒪᓚᐅᕋᖅᑎᒍᑦ, ᐊᖑᓇᓱᒡᕕᐅᕙᒃᑐᕕᓃᒃ, ᕿᖕᓂᐊᖃᕐᕕᕕᓃᒃ, ᓄᓇᒋᔭᐅᓂᑯᐃᓪᓗ. ᑕᐃᒪᑐᖅ ᓂᐱᓕᐅᖅᓯᒪᔪᓂᒃ ᑐᓵᑎᓪᓗᓯ ᑖᒃᑯᓂᖓ ᐊᒃᓱᕉᑎᖃᕐᓂᖏᓐᓂᒃ ᑐᓵᓂᐊᖅᐳᓯ.

 

ᓄᓇᒥᖔᖅᑐᑦ ᐅᓂᒃᑳᑦ

ᑕᕝᕙᓂ ᓂᐱᓕᐅᖅᓯᒪᔪᓂᒃ ᑐᓵᓂᐊᖅᑕᓯ “ᓄᓇᑦᑎᓐᓂ ᐅᓂᒃᑳᕗᑦ”, “ᐊᐳᑎ ᐃᓅᓯᕆᒐᑦᑎᒍ” ᐊᒻᒪᓗ “ᐃᓅᖃᑎᒌᑦᑎᐊᕆᐊᖃᓚᐅᕋᑦᑕ ᓄᓇᕗᑦᑕᐅᖅ ᐆᒪᔪᖃᑦᑎᐊᖁᒋᓪᓗᒍ” ᒪᒃᑖᖅ ᐊᑯᒪᓕᒃ ᖄᐱᒃ ᐊᑕᒍᑦᑎᐊᖅ ᐅᓂᒃᑳᖅᑎᓪᓗᒋᑦ ᐃᒃᐱᐊᕐᔪᒥᐅᓂᒃ ᐊᐅᓪᓛᖃᑎᖃᕆᖅᑐᖅᓯᒪᑦᑎᓪᓗᑕ ᒪᐃ 2008ᒥ ᓂᐱᓕᐅᖅᑕᐅᓚᐅᖅᓯᒪᔪᑦ. ᓂᐱᓕᐅᖅᓯᒪᔪᓂᒃ, ᒪᒃᑖᖅ ᖄᐱᒡᓗ ᐅᓂᒃᑳᖃᑦᑕᓚᐅᕐᒪᑎᒃ ᐊᐳᑎ ᐱᒻᒪᕆᐊᓗᒋᔭᐅᓂᖓᓂᒃ ᐃᒡᓗᓕᐅᕈᑕᐅᕙᒃᖢᓂᓗ ᐊᓐᓇᐅᒪᔾᔪᑎᒋᔭᐅᓪᓗᓂ ᐅᑭᐅᖅᑕᖅᑐᒥ, ᕿᒻᒥᕗᑦ ᖃᐅᔨᒪᑦᑎᐊᕆᐊᖃᕐᓂᑦᑎᓐᓂ ᐃᒃᐱᒋᑦᑎᐊᕐᓗᒋᓪᓗ ᐱᓗᐊᖅᑐᒥ, ᐃᓄᐃᑦ ᓯᕗᓕᖏᑕ ᐃᓅᓯᕆᓚᐅᖅᑕᖏᑦ ᑲᔪᓯᑎᑕᐅᖏᓐᓇᕆᐊᖃᕐᒪᑕ ᐅᓪᓗᒥᒧᑦ. ᐱᖓᔪᖓ ᐅᓂᒃᑳᖅ ᓂᐱᓕᐅᖅᑕᐅᓯᒪᔪᑦᖅ ᖄᐱᒃ ᐅᓂᒃᑳᖅᑎᓪᓗᒍ “ᐱᖅᑐᐊᓗᖕᒥᒃ ᐊᖏᕐᕋᐅᓇᓱᖕᓂᖅ” ᖄᐱᒃ ᐊᓐᓇᐅᒪᔪᓐᓇᕐᓂᕐᒥᒃ ᐅᓂᒃᑲᐅᓯᖃᓚᐅᖅᑐᖅ; ᐅᓂᒃᑳᕈᑎᒋᓗᐊᓚᐅᖅᑕᖓ ᖃᐅᔨᒪᔭᕆᐊᖃᕋᑦᑕ ᐊᕙᑎᒋᔭᑦᑎᓐᓂ. ᐱᖓᔪᖓᑦ ᐅᓂᒃᑳᖅᑕᐅᑎᓪᓗᒍ ᖃᐅᔨᓴᖅᑏᑦ, ᑲᓇᑕᐅᑉ ᒥᕐᖑᐃᖅᓯᕕᓕᕆᔨᒃᑯᑦ ᐃᖅᑲᓇᐃᔭᖅᑎᖏᑦ, ᐃᒃᐱᐊᕐᔪᖕᒥᐅᑦ ᖃᐅᔨᒪᔨᖏᑦ ᐊᐅᓪᓛᖅᓯᒪᑎᓪᓗᑕ ᓄᓇᓂᒃ ᐊᓐᓂᕆᔭᐅᔪᓂᒃ ᑕᑯᔭᖅᑐᖅᓯᒪᓪᓗᑕ ᓂᐱᓕᐅᖅᑕᐅᓚᐅᖅᑐᑦ. ᓄᓇᒥ ᓯᑯᒥᓗ ᐊᐅᓪᓚᖅᓯᒪᔾᔪᑎᒋᓚᐅᖅᑕᕗᑦ, ᐊᕙᑎᕗᑦ ᖃᐅᔨᒪᑦᑎᐊᕆᐊᖃᕐᓂᕗᑦ ᐅᓂᒃᑲᐅᓯᕆᔭᐅᖏᓐᓇᓚᐅᖅᑐᖅ.

ᐃᒃᐱᐊᕐᔪᖕᒥᐅᑦ ᐊᖑᓇᓱᒃᑎᖏᑦ ᐃᓐᓇᑐᖃᖏᓪᓗ ᐊᕙᑎᑦᑎᓐᓂ, ᐊᐳᑎᐅᓪᓗ ᖃᓄᐃᓕᖓᓂᖏᓐᓂᒃ ᐅᓂᒃᑲᐅᓯᖃᖃᑦᑕᓚᐅᖅᑐᑦ ᖃᐅᔨᒪᔭᖏᓐᓂᒃ. ᐱᓗᐊᖅᑐᒥᒃ ᐃᓄᐃᑦ ᑕᑯᓯᒪᓕᕐᒪᑕ ᓯᓚᕗᑦ ᐊᓯᔾᔨᕐᔪᐊᖅᓯᒪᓕᕐᓂᖏᓐᓂᒃ, ᓇᓚᐅᑦᑖᒐᕐᓂᕈᓐᓃᕐᓂᕋᖅᑕᐅᓯᒪᔪᖅ ᖃᐅᔨᒪᓇᖅᐸᒍᓐᓃᖅᖢᓂᓗ ᖃᓄᐃᓕᖓᓂᐊᓕᕐᓂᖓᓂᒃ. ᑭᓯᐊᓂ ᐃᒃᐱᐊᕐᔪᖕᒥᐅᑦ ᖃᐅᔨᓴᐃᓐᓇᖅᑐᑦ ᐅᔾᔨᕈᓱᐃᓐᓇᖅᑐᑦ ᐃᓕᓐᓂᐊᖏᓐᓇᖅᖢᑎᒡᓗ ᐊᕙᑎᕗᑦ ᐊᓯᔾᔨᖅᐸᓪᓕᐊᖏᓐᓇᖅᑎᓪᓗᖑ, ᐃᓐᓇᐃᑦ ᐅᖃᐅᓐᓇᕐᒪᑕ ᐊᐳᑎ “ᐃᓅᓯᕆᒐᑦᑎᒍ’.